aysor.am: Ինչպես բազմիցս նշել եմ, ԵԱՏՄ-ին Հայաստանի անդամակցությունը մեր ղեկավարության առաջնահերթություններից մեկն է, այսօր Երևանում Եվրասիական միջկառավարական խորհրդի նիստին ասաց ՀՀ վարչապետ Նիկոլ Փաշինյանը:
«Այսօր Հայաստանում տեղի են ունենում արմատական բարեփոխումներ, որոնք վերաբերում են մեր հասարակության բոլոր ոլորտներին: Դրանց վերջնական նպատակն է մրցակցային ու տեխնոլոգիապես զարգացած տնտեսության ստեղծումը», – ասաց ՀՀ վարչապետը:
Նա նշեց, որ վերջին տարում հաջողվել է շոշափելի արդյունքներ գրանցել կոռուպցիայի դեմ պայքարում, տնտեսվարող սուբյեկտների համար հավասար դաշտի ստեղծման, դատական իշխանության անկախության հարցերում:
«Մեզ հաջողվել է մինիմալի հասցնել արհեստական մոնոպոլիաների ու օլիգոպոլիաների գործունեությունը: Այսօր Հայաստանում ոչ ոք չի կարող մանիպուլացիա իրականացնել իր քաղաքական ազդեցությամբ ու ազդեցության լծակներով՝ տնտեսական նպատակների հասնելու համար», – ասաց Նիկոլ Փաշինյանը:
Նրա խոսքով՝ սա առողջացրել է տնտեսական ու քաղաքական մթնոլորտը երկրում:
«Այսօր Հայաստանը դինամիկ զարգացող երկիր է, որին բնորոշ է քաղաքական կայունությունն ու կանխատեսելիությունը», – ասաց Հայաստանի վարչապետը:
