pastinfo.am։ Ազգային ժողովում գույքի պակասորդի դեպքի առթիվ հարուցված քրեական գործով կարգավիճակ ունեցող անձ այս պահին չկա։ Այս մասին տեղեկացրեց Դատախազության հանրային կապերի բաժնի պետ Արեւիկ Խաչատրյանը։

Ավելի վաղ հայտնել ենք, որ Ազգային ժողովի աշխատակազմի ղեկավարը գրություն էր ուղարկել այն մասին, որ ԱԺ-ում մոտ 15 միլիոն դրամի գույքի պակասորդ կա, ինչի հիման վրա նյութեր են նախապատրաստվել, եւ հետագայում հարուցվել է քրեական գործ։

Արեւիկ Խաչատրյանը մանրամասնեց, որ ԱԺ աշխատակազմի ղեկավար Տիգրան Գալստյանն իրենց գրությամբ դիմել է այս տարվա հուլիսի 3-ին. «Աշխատակազմի ղեկավարը գրություն է ուղարկել այն մասին, որ ԱԺ աշխատակազմի նստավայրի տարածքում իրականացվել է հիմնական միջոցների գույքագրում, ինչի արդյունքում պարզվել է, որ որոշակի միավոր հիմնական միջոցների պակասորդ կա։ Երեւան քաղաքի Արաբկիր վարչական շրջանի քննչական բաժնում նյութեր են նախապատարստվել եւ պարզվել է, որ պակասում է 36 միավոր գույք, որի ընդհանուր արժեքը կազմում է 15. 554. 953 ՀՀ դրամ»։