tert.am: Վրաստանի հետ ավիահաղորդակցության ժամանակավոր չեղարման մասին ՌԴ որոշման պատճառով վրացական Georgian Airways ավիաընկերությունը զգալի վնասներ է կրում: INTERFAX.RU-ի փոխանցմամբ՝ այս մասին ասվում է վրացական ազգային ավիափոխադրողի հայտարարության մեջ:

Հաղորդվում է, որ ավիաընկերությունը ստիպված է եղել վերադարձնել արդեն իրացված ավիատոմսերի 80 տոկոսը: Ավիատոմսեր ձեռք բերել ցանկացողների թվի կտրուկ կրճատման պատճառով ընկերությունը շուրջ 25 մլն դոլարի կորուստ է գրանցել:

Ավիաընկերության ղեկավարությունը դիմել է Վրաստանի կառավարությանը՝ խնդրելով ֆինանսական օգնություն հատկացնել ընկերությանը, որը դժվարին իրավիճակում է հայտնվել:

Վրաստանի կառավարությունը որոշել է մասնակիորեն փոխհատուցել ավիաընկերության վնասը: Որոշում է կայացվել սուբսիդավորել Ռուսաստանից իրականացվող տարանցիկ չվերթները 600 000 եվրոյի ծավալով: