lragir.am։ ՀՀ քաղաքացի հանդիսացող երեխային Վրաստանի տարածքով այլ երկրի տարածք տեղափոխելու համար ծնողների կողմից տրվող լիազորագրում պետք է նշվի, որ երեխան տեղափոխվում է հենց Վրաստանի տարածքով: Այս մասին տեղեկացրեց քաղաքացին, ով առնչվել է այս խնդրին:
Նշենք, որ ՀՀ քաղաքացի հանդիսացող երեխայի պետական սահմանը հատելու կարգը հետևյալն է: Երեխային Հայաստանի տարածքից դուրս տանելու համար անհրաժեշտ է անձնագիր՝ օտարերկրյա պետություններում անձնագրի վավերականության ժամկետների մասին նշումով։
Իսկ «Անձնագրային գործողությունների կարգի պարզաբանումները հաստատելու մասին» թիվ 12-Ն հրամանի համաձայն՝ առանց երկու ծնողների համաձայնության երեխային ՀՀ տարածքից դուրս տանելու իրավունքը կարող է սահմանափակվել սահմանային մարմնի կողմից: Լիազորագիրը նոտարի կողմից վավերացված համաձայնությունն է, որը տալիս է ծնողը՝ երեխային երկրից դուրս տանելու համար: Ընդ որում, առանց երկու ծնողների համաձայնության երեխան չի կարող հատել սահմանը: ՀՀ Ընտանեկան օրենսգրքի 41-րդ հոդվածի համաձայն՝ երեխա է համարվում տասնութ տարին չլրացած անձը:
