lragir.am: Արտաքին գործերի նախարար Զոհրաբ Մնացականյանն այսօր խորհրդարանում լրագրողների հետ ճեպազրույցում անդրադարձավ ՌԴ արտաքին գործերի նախարար Սերգեյ Լավորվի առաջիկա այցին Հայաստան ու այն տեղեկատվությանը, որ այցի ընթացքում ստորագրվելու է համաձայնագիր, ըստ որի՝ ամերիկյան կողմի աջակցությամբ Հայաստանում ստեղծված կենսալաբորատորիաներ մուտք գործելու թույլտվություն կունենան ռուս մասնագետները:
Մնացականյանն ասաց, որ Լավորվի այցը լինելու է պաշտոնական այց:
«Դա պաշտոնական այց է մեր ռազմավարական գործնկեր երկրի արտաքին գործերի նախարարի կողմից: Եվ վստահ եմ, նկատել եք, որ մենք ունենք բավական դինամիկ շփումներ, ակտիվ երկխոսություն, և մեր օրակարգը չափազանց լայն է, թե երկկողմանի, թե տարածաշրջանային հարցերով, թե գլոբալ առումով: Մենք ունենք տարածաշրջանային զարգացումներ, որոնք ուղղակիորեն վերաբերում են մեր օրակարգին և սա նույնպես մեր համագործակցության ու երկխոսության թեմա է»,-հավելեց նախարարը:
Ինչ վերաբերում է լաբորատորիաների մասով հուշագրին, Զոհրաբ Մնացականյանն ասաց, որ երբ կավարտվեն բանակցությունները, այդ ժամանակ կկարողանան խոսել:
«Որևէ այլ բաներ, որոնք վերաբերում են աղբյուրների արտահայտածին, դա որևէ ազդեցություն չունի մեզ վրա: Եվ շատ հարմար բան չէ, երբ դուրս են հանում տեղեկություններ ու ստեղծում անտեղի քամի»,-ասաց նախարարը:
