Այսօր Արտաքին գործերի նախարար Զոհրաբ Մնացականյանը իր ասուլիսի ընթացքում անդրադառնալով Ռուսաստանից ապաստան խնդրող հայ քաղաքական գործիչների և Հայաստանից ապաստան խնդրող ռուս գործիչներին, ասաց, որ Ռուսատանի և Հայաստանի միջև միջպետական հարաբերությունները ամուր հիմքեր ունեն և չկան որևէ խնդիրներ, կան իրավական գործընթացներ։ Այդ դեպքերը որևէ կերպ կապ չունեն միջպետական հարաբերությունների հետ։
Անդրադառնալով վերջին շրջանում կառավարության կողմից առաջ քաշված «Արցախը Հայաստան է և վերջ», կարգախոսին, նախարարն ասաց
«Ես պետք է հղում կատարեմ ԱԳՆ հայտարարությանը, թե ինչպես է դա ներառվում մեր մոտեցումներում ԼՂՀ խնդրի կարգավորման հարցում։
Մեծ նշանակություն ունի վարչապետի շեշտադրումերի կոնտեքստը և նպատակը։ Վարչապետը շատ հստակ և ընդարձակ խոսել է համահայկականության մեր գերակա խնդիրների մասին, համերաշխության միասնականության և զարգացման մեր համահայկական նպատակների մասին։
Միևնույն ժամանակ խոսելով ղարաբաղյան խնդրի խաղաղ կարգավորման մասին շատ հստակ արտահայտել է իր տեսակետը ր վերահաստատել է այն սկզբունքային մոտեցումները, որոնք արտահայտված են Հայաստանի կողմից այդ գործընթացի նպատակով։ Նորից կրկնեմ, որ ԼՂՀ խնդրի կարգավորման խաղաղ բնույթը այլընտրանք չունի և մենք ամեն ինչ անելու ենք, որ մեր ջանքերը կենտրոնացնենք այդ ուղղությամբ»։
