aysor.am։ Սեպտեմբերի 8-ին Արցախի Հանրապետության բոլոր 228 համայնքում կկայանան ՏԻմ ընտրություններ:
Առաջադրվել է 41 թեկնածու և 1401 ավագանու անդամ, որից 7-ը ներկայացրել է ինքնաբացարկի դիմում:
Արցախի Կենտրոնական ընտրական հանձնաժողովի նախագահի տեղակալ Եղիշե Արզումանյանն աննախադեպ է համարում այս ընտրությւուններին դիտորդական կազմակերպութունների գրանցումը:
«Ներկայում հավատարմագրվել է հայաստանյան չորս դիտորդական կազմակերպություն 144 դիտորդով, վեց տեղական կազմակերպություն՝ 168 դիտորդով, 12 լրատվամիջոց՝ 38 լրագրողով, չորս հայաստանյան լրատվամիջոց՝ 12 լրագրողով», – լրագրողների հետ զրույցում ասաց Արզումանյանը, Արցախից հայտնում է Aysor.am-ի թղթակիցը:
ԿԸՀ նախագահի տեղակալի խոսքով՝ նախորդ ՏԻՄ ընտրությունների դեպքում Արցախում գրեթե չեն եղել դիտորդական առաքելություն իրականացնող կազմակերպություններ:
«Հիմա, իրոք որ, աննախադեպ է, 400-ից ավելի դիտորդի ենք սպասում», – ասաց նա:
Թե ինչով է պայմանավորված ակտիվությունը, Եղիշե Արզումանյանի խոսքով, ինչպես Հայաստանում, այնպես էլ Արցախում կազմակերպությունները ցանկանում են արդար ընտրություններ տեղի ունենան:
ԿԸՀ նախագահի տեղակալը վստահեցրեց՝ որևէ լարվածություն չկա:
«Գրեթե ավարտվել են բոլոր կազմակերպչական աշխատանքները, թերթիկները տպագրված են 103 հազար 14 ընտրողի հաշվարկով: Վաղվանից բոլոր հանձնաժողովները կստանան թերթիկները», – ասաց Ե. Արզումանյանը:
