azatutyun.am։ Կրասնոյարսկից 160 կիլոմետր հարավ գտնվող ոսկու հանքում ջրամբարտակի փլուզման հետևանքով զոհվել է առնվազ 15 մարդ:
Ողբերգությունը տեղի է ունեցել Շետինկինո գյուղի մոտակայքում: 15 մարդ փոխադրվել է հիվանդանոց, նրանցից 3-ը ծանր վիճակում են:
Ենթադրվում է, որ զոհերի թիվը կավելանա, քանի որ վթարի պահին հանքում, ենթադրաբար, եղել է մոտ 80 աշխատող:
Ջրամբարտակի փլուզմանը նպաստել են անցած օրերին այդ շրջանը պատուհասած հորդառատ անձրևները:
«Ամբարտակի հիդրավլիկ սարքավորումն ամբողջությամբ ոչնչացվել է, դուրս մղված 3.5-4 մետրի հասնող ջուրը լրիվ սրբել-տարել է «Սիսիմ» ընկերության բանվորների երկու տները»,- ասել է Կրասնոյարսկի շրջանի արտակարգ իրավիճակների բաժնի ղեկավարի տեղակալ Օլեգ Մատիլենկոն:
Ռուսաստանի իրավապահները հետաքննություն են սկսել անվտանգության ապահովման կանոնները խախտելու փաստով:
«Հիդրավլիկ սարքավորումն ինքնաշեն էր, կարծում եմ, այստեղ բոլոր հնարավոր և անհնարին մեթոդներով խախտել են անվտանգության ամենատարրական պահանջները»,- ասել է Կրասնոյարսկի մարզի վարչակազմի ղեկավար Յուրի Լապշինը:
Տեղական վարչակազմի պաշտոնյաների փոխանցմամբ, ոսկու հանքը պետական ատյաններում գրանցված չի եղել:
