armtimes.com: Կանխարգելման օրակարգը Հայաստանի արտաքին քաղաքականության մեջ արդեն արմատավորված է 1998 թվականից ի վեր։ Այս մասին այսօր կառավարությունում հրավիրած ասուլիսի ժամանակ ասաց արտաքին գործերի նախարար Զոհրաբ Մնացականյանը՝ ի պատասխան հարցին, թե ի՞նչ ակնկալիքներ կան միջազգային գործընկերներից ապրիլի 24-ի հետ կապված։ Նա ներկայացրեց մի շարք ֆորումներ, որտեղ Հայաստանի ջանքերով շարունակական աշխատանքներ են տարվել։
Նախարարն ընդգծեց, որ այս տարի Հայաստանը եւս ներկայացրել է հերթական բանաձեւը, որն ամփոփում է նախորդ աշխատանքները եւ ուրվագծում է հաջորդ փուլի աշխատանքները միջազգային հանրության համար։ Նրա խոսքով՝ այդ բանաձեւն ուրվագծում է Covid-ի արդյունքում ներկա պահին առկախված՝ մարդու իրավունքների խորհրդի աշխատանքները։ Նա վստահեցրեց որ, երբ աշխատանքները վերսկսվեն, բանաձեւն անմիջապես այդ գործընթացը կհասցնի իր ավարտին։ «Այսինքն՝ մենք շարունակական դա անում ենք»,- նկատեց Մնացականյանը։
Նա եւս մեկ անգամ շեշտեց, որ Հայաստանը ստեղծել է տարբեր այլ ձեւաչափեր եւ պլատֆորմեր, որոնցից ընդգծեց «Ցեղասպանությունների կանխարգելման գլոբալ ֆորումը»։ Մնացականյանի խոսքով՝ այս տարի նախատեսվում է իրականացնել չորրորդ ֆորումը։ «Սա արդեն մշտական պլատֆորմ է միջազգային հանրության էքսպերտային հասարակական ներուժը համախմբելու համար»,- եզրափակեց նախարարը։
