tert.am: Ամերիկյան Reddit ընկերության համահիմնադիր Ալեքսիս Օհանյանը Հայոց ցեղասպանության 106-րդ տարելիցի կապակցությամբ հայտարարել է, որ հույս ունի՝ ԱՄՆ-ի նախագահ Ջո Բայդենը վերջապես կճանաչի պատմական իրողությունը՝ Հայոց ցեղասպանությունը։
«Քաղաքականությամբ պայմանավորված՝ ԱՄՆ-ն երբեք չի ճանաչել Հայոց ցեղասպանությունը, բայց կարծում եմ՝ Ջո Բայդենը պատրաստվում է պաշտոնապես ճանաչել այն, ինչը նվազագույնն է, որ մենք՝ ամերիկացիներս, կարող ենք անել, բայց դա կարևոր քայլ է, քանզի Ցեղասպանությունը մեր՝ հայերիս և հատկապես սփյուռքահայերի ինքնության մասն է, որը փոխանցվել է սերնդեսերունդ»,- նշել է Օհանյանը։
Նրա խոսքով՝ «աշխարհասփյուռ հայերի համար է՛լ ավելի ցավալի է այն փաստը, որ այդ ոճրագործներն ավելի քան 100 տարի չեն ընդունել իրենց մեղքը և պատասխանատվության չեն ենթարկվել այդ թվում՝ աշխարհի հզորագույն երկրի՝ ԱՄՆ-ի կողմից»։
«Սա կարևոր քայլ է, չեմ ցանկանում հուսախաբ լինել, քանի որ միևնույն խոստումը լսել ենք նաև մյուս նախագահներից, բայց կարծում եմ՝ այս անգամ դա իրականություն կդառնա և ես այդ կապակցությամբ չափազանց ոգևորված էմ։ Ինձ չհիասթափեցնեք, նախագահ Բայդեն»,- եզրափակում է Օհանյանը։
