tert.am: Վարչապետի հանձնարարականից հետո մենք էլ ավելի ենք խստացրել ճանապարհատրանսպորտային ծառայությունը. լրագրողների հետ հանդիպմանն այս մասին հայտարարեց ՀՀ ոստիկանապետ Վալերիյ Օսիպյանը՝ անդրադառնալով ՃՏՊ-ների թվի աճին և այն հարցին, որ ոստիկանությունն իր գործառույթները չի կատարում այս մասով:
Նա նշեց, որ իր կողմից կա համապատասխան հանձնարարական, և ՃՈ ծառայողները բացառել են հանդուրժողականությունը այս հարցում:
«Նաև վարչապետի հանձնարարականով ստեղծվել է աշխատանքային խումբը, որը շուտով կանցնի գործի, վեր կհանեն բոլոր խնդիրները: Բացի այդ, նաև վստահեցնում եմ, որ այստեղ միայն ՃՈ-ից և ոստիկանությունից չի կախված, բազմաթիվ խնդիրներ կան, նաև կան գերատեսչություններ, որոնք ուղիղ կապ ունեն այս ամենի հետ»,-ասաց նա:
Թե որոնք են ճանապարհատրանսպորտային պատահարների հանգեցնող խնդիրը, Օսիպյանը թվարկեց՝ վատ լուսավորությունը, ճանապարհների վատ լինելը, ճանապարհային նշանների բացակայությունը կամ դրանց տեսանելի չլինելը, եղանակային պայմանները, տրանսպորտային միջոցների ոչ տեխնիկական վիճակին համապատասխան լինելը:
«Մեր ժողովրդի մոտ «տեխասմոտր» գաղափարը կրում է ոչ թե ձևական բնույթ, այլ որևէ տեսակի բնույթ չի կրում. մեքենան ամեն տարի պետք է զննվի և համապատասխանեցվի գործարանային տվյալներին»,-ասաց նա:
Դիտարկմանը, թե ՃՈ-ն վատ է աշխատում, Վալերիյ Օսիպյանն արձագանքեց՝ վատ աշխատելու պարագայում ինչպե՞ս է ստացվել, որ այս տարի ավելի շատ խախտում են հայտնաբերել, քան անցած տարի:
«Գումարած այս ամենին նաև տրանսպորտային միջոցների աննախադեպ ներմուծումը ՀՀ»,-նկատեց նա և նշեց, որ լուրերով տեսել է՝ անցակետում ԱԺ պատգամավոր Միքայել Մելքումյանը հայտարարեց, որ մեկ օրում մինչև 300 տրանսպորտային միջոց է ներմուծվում ՀՀ:
