Տնտեսական մրցակցության պաշտպանության պետական հանձնաժողովի նախկին նախագահ Արտակ Շաբոյանն ու ընտանիքի անդամներն օգոստոսի 23-ին հրավիրվել են գլխավոր դատախազության ապօրինի ծագում ունեցող գույքի բռնագանձման գործերով վարչություն։ Ա․ Շաբոյանին պատկանող գույքի առնչությամբ իրականացվել է ուսումնասիրություն։
Դատախազությունը Արտակ Շաբոյանին, կնոջը՝ Քրիստինե Եղիազարյանին, մորը՝ Մարիետա Մանուկյանին, և դստերը՝ Անի Շաբոյանին, հրավիրել է, որպեսզի ծանոթանան նյութերին, քանի որ վերջիններիս անվամբ հաշվառված գույքը ևս ենթակա է բռնագանձման։
Նշենք, որ Արտակ Շաբոյանը Տնտեսական մրցակցության պաշտպանության պետական հանձնաժողովի նախագահի պաշտոնը զբաղեցրել է 2010թ․ մարտից մինչև 2019թ․ ապրիլ։ Մինչ այդ, Շաբոյանը եղել է Մաքսային պետական կոմիտեի նախագահի տեղակալ, այնուհետև՝ Պետական եկամուտների կոմիտեի նախագահի տեղակալ, իսկ դրանից առաջ՝ Կենտրոնական բանկում։
Դատախազությունն այս փուլում չի հանրայնացնում, թե ինչ գույք է ցանկանում բռնագանձել կամ ինչ դրամային պահանջ ունի։ Պատճառաբանում են, թե շահագրգիռ անձիք կարող են պարզաբանումներ, ապացույցներ ներկայացնել, ինչը կարող է հանգեցնել բռնագանձման ենթակա գույքի ցանկի կամ չափերի փոփոխության։
