panorama.am: Վրաստանի նախագահ Սալոմե Զուրաբիշվիլին վստահ է, որ նոր խորհրդարանական ընտրություններ անցկացնելով երկիրը կկարողանա դուրս գալ ներկայիս քաղաքական ճգնաժամից։ Վրաստանի նախագահի հայտարարությանն անդրադարձել է «ՌԻԱ նովոստի»-ն։
Այս մասին Զուրաբիշվիլին հայտարարել է եվրոպական ութ երկրների խորհրդարանների արտաքին հարաբերությունների հանձնաժողովների նախագահների պատվիրակության անդամների հետ հանդիպումից հետո։ Պատվիրակության կազմում ընդգրկված են Ֆինլանդիայի, Շվեդիայի, Ֆրանսիայի, Լիտվայի, Լատվիայի, Էստոնիայի, Լեհաստանի և Գերմանիայի օրենսդիրները։
«Դատելով ԿԸՀ-ի (Վրաստանի) ղեկավարի հայտարարություններից՝ պարզ է, թե ինչ որոշում կկայացնի ԿԸՀ-ն։ Այստեղ անակնկալներ չեն կարող լինել։ Ճգնաժամն ակնհայտ է, և մեր ընկերներն այստեղ են՝ ուղիներ գտնելու։ Վրաստանը դուրս կգա այս ճգնաժամից… Մենք կվերադառնանք նոր ընտրությունների, որպեսզի երբ ժամանակը գա, Վրաստանը ստանա լեգիտիմ խորհրդարան, լեգիտիմ կառավարություն և սա մեր ճանապարհն է դեպի կայունություն, ժողովրդավարություն և Եվրոպա»,-ասել է Զուրաբիշվիլին:
