armenpress.am: ԱՄՆ պետքարտուղար Էնթոնի Բլինքենը չծրագրված այց է կատարել Իրաք՝ հանդիպելու վարչապետ Մուհամմեդ Շիա ալ-Սուդանիի հետ։ Այս մասին հայտնում է CNN-ը։
Նշվում է, որ այցը տեղի է ունեցել Սիրիայի կառավարության անկումից հետո ստեղծված իրավիճակի համատեքստում, որն այժմ մեծ ուշադրություն է գրավում միջազգային հանրության շրջանում։
Բլինքենը Բաղդադում ավելի քան մեկ ժամ քննարկումներ է անցկացրել Սուդանիի հետ։ Հանդիպումը կազմակերպվել է Թուրքիայի և Հորդանանի բարձրաստիճան պաշտոնյաների հետ մի շարք հանդիպումներից հետո՝ նպատակ ունենալով համաձայնեցնել մոտեցումները Սիրիայում Բաշար ալ-Ասադի ռեժիմի հանկարծակի անկումից հետո։
Պետքարտուղարը շեշտել է, որ կարևոր է ապահովել Սիրիայի ժամանակավոր կառավարության ձևավորումը, որը թույլ չի տա երկիրը դառնալ ահաբեկչության կամ ծայրահեղականության կենտրոն։
«ԻԼԻՊ ահաբեկչական խմբավորումը, անկասկած, կփորձի վերախմբավորվել»,- հայտարարել է Բլինքենը։
Պետքարտուղարը այցելության ընթացքում շեշտել է ԱՄՆ-ի հավատարմությունը Իրաքի անվտանգության, կայունության և ինքնիշխանության պահպանմանը։
Այցից հետո Բլինքենը նախատեսում է մեկնել Հորդանան, որտեղ մասնակցելու է նախարարական հանդիպման՝ նվիրված Սիրիայի պետական ինստիտուտների վերակառուցման ջանքերին՝ նպատակ ունենալով պահպանել երկրի միասնականությունը, տարածքային ամբողջականությունը և բոլոր քաղաքացիների իրավունքները։
«Մենք տարածաշրջանում ենք՝ Սիրիայում և նրա հարևանների համար ստեղծված թե՛ հնարավորությունների, թե՛ վտանգների համատեքստում։ Մեր աշխատանքը կենտրոնացած է աջակցելու սիրիացի ժողովրդին, որպեսզի այն հեռանա Ասադի դաժան ռեժիմից»,- նշել է Բլինքենը Աքաբայում։
