armenpress.am: Թբիլիսիի քաղաքային դատարանը սահմանն ապօրինի հատելու գործով, որպես խափանման միջոց, պահպանել է Վրաստանի նախկին նախագահ Միխեիլ Սաակաշվիլիի նկատմամբ կալանքը, չնայած այն հանգամանքին, որ նա արդեն պատիժ է կրում այլ գործերով։ Այդ մասին տեղեկացնում է «Արմենպրես»-ը՝ վկայակոչելով «TACC»-ը։
Հաղորդվում է, որ դատական նիստի ժամանակ Սաակաշվիլիի փաստաբան Բեկա Բասիլայան միջնորդություն է ներկայացրել՝ կալանքը չեղարկելու համար այն բանից հետո, երբ ավարտվել է սահմանի ապօրինի հատման գործով դատարանում ապացույցների ուսումնասիրման փուլը։ Փաստաբանի խոսքով՝ այնպիսի խափանման միջոցի համար, ինչպիսին կալանքն է, հիմքեր չկան, քանի որ դատարանը շուտով պետք է հրապարակի գործով վճիռը, իսկ նախկին նախագահն արդեն կալանքի տակ է։
Դատավոր Միխեիլ Ջինջոլիան պարզաբանել է, որ Սահակաշվիլիի փախուստի կամ նոր հանցագործության վտանգը պահպանվում է, ուստի կալանքը չեղարկելու միջնորդությունը մերժվել է։
