Վրաստանում «Օտարերկրյա ազդեցության թափանցիկության մասին» օրենքի նախագիծը պաշտոնապես հետ է կանչվել։ Երկրի խորհրդարանը երկրորդ ընթերցմամբ մերժեց օրենքի նախագիծը։ Այս մասին հայտնում է Վրաստանի Առաջին ալիքը։
Հիշեցնենք՝ Վրաստանի խորհրդարանը մարտի 7-ին 76 կողմ, 13 դեմ ձայներով առաջին ընթերցմամբ ընդունել էր «Օտարերկրյա ազդեցության թափանցիկության մասին» օրենսդրական փաթեթը, որը խորհրդարան էր բերել «Վրացական երազանք» կուսակցության շարքերը լքած և հակաարևմտյան շարժում ձևավորած «Ժողովրդի ուժը» շարժումը: Փաթեթը ենթադրում էր «օտարերկրյա գործակալներ» կոչել բոլոր այն ոչ բիզնես իրավաբանական անձանց ու լրատվամիջոցներին, որոնց եկամուտների ավելի քան 20 տոկոսը ֆինանսավորում են օտար ուժերը։ Հեղինակներն այն համարում են «ամերիկյան», ընդդիմախոսները՝ «ռուսական»։
Օրինագծի՝ առաջին ընթերցմամբ ընդունմանը հաջորդեցին ցույցերը, բողոքի, անհնազանդության ակցիաները Թբիլիսում, որոնք ոստիկանությունն ուժի գործադրմամբ ցրեց:
Իշխող «Վրացական երազանք» կուսակցությունը և «Ժողովրդի ուժ» հասարակական շարժումն մարտի 9-ին հայտարարեցին օրինագիծը խորհրդարանից հետ կանչելու որոշման մասին։ Չնայած օրենքի հետկանչմանը ակտիվիստները երեկ չդադարեցրին բողոքի ակցիները։ Նրանք նվստահություն էին հայտնում երկրի իշխանություններին, քանի որ օրինագծերը հետ կանչելու մասին որոշումը հայտարարվել էր միայն բանավոր և չէր հաստատվել խորհրդարանում նախաձեռնության դեմ քվեարկությամբ։
