armenpress.am: Սուդանի զինված ուժերը և նրանց դիմակայող Արագ աջակցության ուժերը (ԱԱՈւ) համաձայնության են հասել 72-ժամյա հրադադարի շուրջ: Այս մասին հայտարարել է ԱՄՆ-ի պետքարտուղար Էնթոնի Բլինքենը:
«Վերջին 48 ժամվա ինտենսիվ բանակցություններից հետո Սուդանի զինված ուժերը և «Ազատ արձագանքման ուժերը» համաձայնության են հասել երկրի ամբողջ տարածքում հրադադարի շուրջ, որը կսկսվի ապրիլի 24-ի կեսգիշերին և կտևի 72 ժամ», – ասվում է նրա հայտարարության մեջ:
«Մենք կաշխատենք Սուդանում հակամարտող կողմերի և մեր գործընկերների հետ ընդհանուր նպատակի՝ իշխանությունը Սուդանի քաղաքացիական կառավարությանը հանձնելու ուղղությամբ», – հավելել է նա։
Սուդանում հրադադար կազմակերպելու նախկին փորձերը հաջողություն չեն ունեցել:
Ապրիլի 15-ից Սուդանի մայրաքաղաք Խարթումում և մի շարք այլ քաղաքներում թեժ մարտեր են սկսվել զինվորականների և ԱԱՈւ-ի միջև՝ ծանր սպառազինության կիրառմամբ։ Բախումների ընթացքում հարյուրավոր խաղաղ բնակիչներ են զոհվել, հազարավոր մարդիկ՝ վիրավորվել: ԱԱՈւ-ի հրամանատարության հաղորդագրության մեջ ասվում է, որ զինված ուժերն, առանց նախնական ծանուցման, պաշարել են մայրաքաղաքի հարավային արվարձանում գտնվող իրենց հենակետերից մեկը։ Բանակի հրամանատարությունն իր հերթին իր գործողությունները բացատրել է նրանով, որ ԱԱՈւ-ն վերջերս մեկ անգամ չէ, որ գործել է առանց զինվորականների հետ որևէ համաձայնեցման։
