ԵՄ արտաքին քաղաքականության հարցերով բարձր ներկայացուցիչ Ժոզեպ Բորելը հայտարարություն է տարածել Արցախի շփման գծի ողջ երկայնքով սկսված ռազմական գործողությունների առնչությամբ․
«Եվրամիությունը դատապարտում է ռազմական էսկալացիան շփման գծի երկայնքով և Ղարաբաղի այլ վայրերում։ ԵՄ-ն ցավում է էսկալացիայի հետևանքով մարդկային կորուստների համար։ Մենք կոչ ենք անում անհապաղ դադարեցնել ռազմական գործողությունները, իսկ Ադրբեջանին՝ դադարեցնել այժմյան մարտական գործողությունները։
Հրատապ անհրաժեշտություն կա, որ Բաքուն և Ղարաբաղի հայերը վերադառնան երկխոսության: Այս ռազմական էսկալացիան չպետք է օգտագործվի որպես պատրվակ ստիպելու տեղի բնակչությանն արտագաղթել։
Բռնությունը պետք է դադարեցվի՝ խաղաղության և կարգավորման բանակցությունների համար բարենպաստ միջավայր ստեղծելու համար։ Պահանջվում է իրական հանձնառություն բոլոր կողմերից՝ բանակցությունների արդյունքների ուղղությամբ աշխատելու համար: ԵՄ-ն լիովին ներգրավված է երկխոսությունը հեշտացնելու գործում»,- ասված է հայտարարության մեջ։
