news.am: Հակակոռուպցիոն առաջին ատյանի դատարանը, դատավոր Վահե Դոլմազյանի նախագահությամբ, փետրվարի 14-ին մերժել է վարույթն իրականացնող մարմնի միջնորդությունը` ՊՆ տեղեկատվության և հասարակայնության հետ կապերի վարչության նախկին պետ Գևորգ Ալթունյանի նկատմամբ կիրառված խափանման միջոց տնային կալանքը ևս երկու ամսով երկարաձգելու միջնորդությունը: Ըստ այդմ` Ալթունյանի նկատմանբ կիրառվել է գրավը և այժմ նա ազատության մեջ է:
Այս առնչությամբ Գևորգ Ալթունյանի պաշտպան, Միջազգային և համեմատական իրավունքի կենտրոնի նախագահ Սիրանուշ Սահակյանը NEWS.am-ի հետ զրույցում նշեց.
«Շուրջ 9 ամիս տևող նախաքննության ընթացքում այդպես էլ ձեռք չեն բերվել ապացույցներ առ այն, որ Գևորգ Ալթունյանը որևէ առնչություն ունի ՊՆ-ից ոչ թե 106 միլիոն, այլ նույնիսկ 10 դրամ հափշտակելու հետ: Ավելին` վաղուց արդեն ապացուցված է, որ Գևորգ Ալթունյանի հեղինակած թվային համակարգը, որի «չգոյության» համար էլ հարուցվել էր այս քրեական գործը, ոչ միայն գոյություն ունի, այլև ամբողջական ծավալով դատարանի դահլիճում արդեն իսկ ներկայացրել է հենց պարոն Ալթունյանը»:
