news.am: Սահմանազատման գործընթացում Բերքաբերի հատվածում խնդիր չկար, արդյունքում էլ խնդիր չկա: Այս մասին այսօր՝ մայիսի 16-ին, ՀՀ կառավարության նիստում հայտարարեց ՀՀ վարչապետ Նիկոլ Փաշինյանը:
«Մենք ասում ենք, որ Բաղանիս-Ոսկեպար գյուղերի հատվածներում հնարավոր էին խնդիրներ, բայց գործնականում պարզվեց, որ խնդիր չկա: Գիտեք, որ այնտեղ շատ զգայուն հարցեր կային՝ կապված Ոսկեպարի եկեղեցու և նաև Ոսկեպար-Բաղանիս հին ճանապարհի հետ: Սահմանազատման արդյունքում այդ ճանապարհը ոչ միայն ամբողջությամբ Հայաստանի ինքնիշխան տարածքում է, այլև նոր հանգամանքների բերումով այդ ճանապարհը երթևեկության համար այլևս անվտանգ է:
Եկեղեցու հատվածում մենք որևէ խնդիր չունեցանք, որովհետև, եթե չեմ սխալվում, համենայն դեպս, ինձ զեկուցել են՝ բավականին մեծ տարածություն կա եկեղեցու և սահմանային գծի հատվածում»,- ասաց նա։
Անդրադառնալով Կիրանցի հատվածում սահմանազատմանը՝ Փաշինյանն ասաց. «Ինչո՞ւ որոշակի խնդիրներ ունենք Կիրանցի հատվածում, որովհետև որդեգրել ենք սկզբունքը, որ սահմանն անցնում է այնտեղով, որտեղով անցնում է: Այս սկզբունքը գործուն է Հայաստանի և Ադրբեջանի միջև սահմանի բոլոր տեղամասերի և բոլոր հատվածների համար: Մենք սրանով ստեղծում ենք սահմանազատման բանաձև, որը պետք է գործի սահմանազատման ամբողջ գործընթացի համար: Սա նշանակում է, որ սահմանազատման գործընթացը դառնում է մաքսիմալ կանխատեսելի»:
Նա ընդգծեց, որ սահմանազատումն այս սկզբունքով իրականացնելու արդյունքում առաջացած բոլոր խնդիրները ՀՀ կառավարությունը հետևողականորեն կլուծի։
