Ադրբեջանի պաշտպանության նախարարությունը հայտարարություն է տարածել՝ անդրադառնալով ՀՀ պաշտպանության նախարարի՝ Ֆրանսիայում CAESAR հրետանային համակարգի ձեռքբերման պայմանագրի ստորագրմանը։
«Այն փաստը, որ, չնայած ադրբեջանական կողմի նախազգուշացմանը, Ֆրանսիան Հայաստանին մահաբեր ու հարձակողական հրետանի և այլ զինատեսակներ է մատակարարում, Հարավային Կովկասում Ֆրանսիայի սադրիչ գործողությունների հերթական վկայությունն է» – նշում է երկրի պաշտպանական գերատեսչությունը։
Ըստ ադրբեջանական կողմի՝ «Մակրոնի ռեժիմը խոչընդոտ է Հայաստանի և Ադրբեջանի միջև հարաբերությունների կարգավորման ու տարածաշրջանում կայուն խաղաղության ապահովման համար»։
Երկրի ՊՆ-ն հայտարարում է՝ «Ֆրանսիայի կողմից Հայաստանի վերազինումը քաղաքական անպատասխանատվություն է և ճանապարհ դեպի նոր պատերազմ»։
Ադրբեջանի ՊՆ-ն նաև նշում է, թե Հարավային Կովկասում իրավիճակի սրման և ռազմական գործողությունների նոր օջախի ստեղծման «պատասխանատվությունն ամբողջությամբ ընկնելու է Հայաստանի ու Ֆրանսիայի ղեկավարության վրա»։
