azatutyun.am։ ԱՄՆ Հետախուզությունների դաշնային բյուրոյի ղեկավար Քրիստոֆեր Ռեյը հայտարարարել է, թե ամերիկյան ընտրություններին միջամտելու` Մոսկվայի շարունակական փորձերը լուրջ քաղաքական սպառնալիք են և մարտահրավեր` հակահետախուզության համար:
Ելույթ ունենալով Վաշինգտոնում` Միջազգային հարաբերությունների խորհրդում, Ռեյը պնդել է, թե ամերիկյան հատուկ ծառայությունները Կրեմլի կողմից լայնածավալ միջանտություն են ակնկալում հաջորդ տարի կայանալիք նախագահական ընտրություններում:
Ամերիկյան ընտրությունների վրա ազդելու, ընտրողներին մանիպուլացնելու պնդումները օրակարգային դարձան 2016֊ի նախագահական ընտրությւոններից հետո: Ավելի քան երկու տարի այս հարցը քննող հատուկ դատախազ Ռոբերտ Մյուլլերը շաբաթներ առաջ հայտարարեց` ապացուցված է, որ Ռուսաստանը փորձել է միջամտել 2016-ի ԱՄՆ-ի նախագահական ընտրություններին, բայց մյուս կողմից՝ հետաքննությունը չի գտել որևէ ապացույց, որ նախագահ Թրամփը կամ նրա նախընտրական թիմը դավադրության մեջ են եղել Ռուսաստանի հետ:
